النظافة من الإيمان .. كلنا نعلم ذلك .. ونعلم أيضا أنها فطرة في مخلوقات الله.
فطرالله المخلوقات على النظافة، فلا تجد مخلوقاً كائنا ما كان .. إلا ويضع نظافته أول أولوياته .. ده حتى الذبابة كتير بنشوفها واقفة تاخد شاور عالناشف بارجلها.
- طيب لما هي النظافة من الايمان وفطرة الله في خلقه..
حضرتك جاي تكلمنا في ايه؟
في النظافة برضه .. إذا كان ده حال جميع المخلوقات .. أمال الإنسان يكون ايه؟
للأسف كتيييير من البشر بيعتبروا النظافة أوبشن .. ومقصدش هنا النظافة الشخصية فقط .. لا طبعا.. أنا أقصد نظافة الجسم .. نظافة المكان .. نظافة الملبس .. نظافة القلب .. نظافة اللسان.. والقلب واللسان دول ينضفوا قبل الطبخ هههههههه.
ايه الخفة دي كلها.. أنا بتكلم جد احنا كبشر لازم كل حاجة تبقى نظيفة جوانا وبرانا وحوالينا.
من جوانا .. لازم نبقى نضاف القلب واللسان والنية .. فإذا كانت النظافة الشخصية بتحمينا من أمراض عضوية كتير .. فالنظافة الداخلية بتحمينا من أمراض نفسية كتييييييير اوووووووي.
بتحمينا من الحقد والحسد والغضب والنميمة و ... و ... و ... من برانا .. يعني مظهرنا ولبسنا وجسمنا .. لازم يكونوا نضاف .. ريحتهم زكية أو على الأقل غير منفرة .. عشان أحمي نفسي واللي حواليا من أي أذى.
لازم المكان اللي نعيش فيه يكون نظيف .. وده مش معناه اني آخد مخلفات مكاني وأرميها أو أتخلص منها في مكان جاري أو زميلي .. زي مابنشوف كتير اوي .. الأمر اللي اضطر ناس كتير تكتب يفط .. أنا باعتبرها ساخرة جدا .. يقولوا فيها ( ممنوع القاء القمامة أمام المنزل .. أو .. ممنوع القاء القمامة أمام المسجد .. أو .. مكان القمامة مش هنا يا (تيييييييت)).
وده طبعا يرجع لنظافتنا الداخلية .. نظافة طباعنا ونوايانا.
تخيلوا كدة الطفل الرضيع لما بيكون نظيف .. بيكون مبسوط وبيلعب ويضحك وتاخد منه أحلى كلام ولعب .. ومجرد مايكون محتاج يغير أو يكون عرقان شوية .. تلاقيه يأريف ويعيط ويزن لحد ما ياخد شاور .. أهو كل حاجة حواليك اتعامل معاها معاملة الطفل الصغير .. بيتك .. حتلاقيه بيضحكلك وانت قاعد فيه.
هدومك .. هتلاقيها بتديك ثقة في نفسك.
مكتبك .. حتلاقيه فاتح نفسك على الشغل.
سطح المكتب على الكمبيوتر .. هتلاقيه رايق وبيضحك.
موبايلك .. حتلاقيه مش بيهنج وسريع معاك ومساعدك. عربيتك .. هتحس انها فرحانة .. نشيطة .. رايقة ومروقاك.
جهازك المعملي .. حتلاقيه بيديك أفضل وأدق النتايج.
أولادنا وأطفالنا لازم نربي فيهم من صغرهم ثقافة النظافة بجميع جوانبها .. لازم ندربهم يكونوا نضاف ونعلمهم ازاي.
انت مش قلت دي فطرة ... خلاص هم حيطلعوا نضاف.
-لا طبعا اوعوا تفكروا كدة .. البيئة المحيطة بتأثر وتغير كتير في الانسان وبتخليه يتخلى عن حاجات حلوة كتير ربنا خلقه عليها .. فلازم نكون سند لأولادنا .. وقبل السند لازم نكون قدوة ليهم.
عايزين نزرع بذرة النظافة في أولادنا عشان ربنا يحميهم من أمراض النفس وأمراض البدن.
