أكيد دي مش إدارة جديدة في مؤسستك .. لا يا خفيف ولا الاسم الحركي لإدارة الموارد البشرية (ربنا يجعل كلامنا خفيف عليهم).
إدارة الغضب تعني .. ازاي تتحكم في نفسك وقت الغضب .. ازاي تدير لحظات غضبك.
اسأل نفسك كدة .. كام مرة خسرت بسبب عصبيتك وغضبك؟
كام واحد بيطلق مراته وبيته وعياله يتشردوا في لحظة غضب؟
كام واحد بيفقد وظيفته في لحظة غضب؟
كام واحد دمر او كسر حاجات مهمة وغالية في لحظة غضب؟
مش بس كدة .. كمان كام واحد قتل في لحظة غضب؟
من هنا جت أهمية علاج الغضب ووضع خطط للتحكم في النفس وقت الغضب.
وكانت الأسبقية بلا شك لرسول الرحمة والانسانية سيدنا محمد (ص) لما نصحنا في حديث شريف انك لما تبقى غضبان أول حاجة تعملها تستعيذ بالله من الشيطان الرجيم .. وبعدين ان كنت واقف .. تقعد .. وان كانت قاعد .. تضطجع.. اخدت بالك؟
أول حاجة تستعيذ بالله من الشيطان .. الله .. معنى كدة ان الغضب من الشيطان؟
اه تخيل ببساطة الشيطان عارف انك لحظة الغضب بتخرج عن شعورك وترتكب المعاصي مثل السب والقذف والاعتداء بالأيدي والسلاح كمان أو ممكن تهد بيتك وتطلق مرات أو تطلبي الطلاق من جوزك.. فيفضل ينفث فيك ويوسوس لك عشان يوصلك لأسوأ حالة.
يبقى دي الخطوة الأولى في إدارة الغضب .. الاستعاذة بالله .. طيب الخطوة التانية؟
تاني خطوة لازم تغير من وضعية جسمك .. لان ده بيخرج الطاقة السلبية .. زي انك تدور وشك الناحية التانية أو انك تقد لو كنت واقف زي ما نصحنا رسول الله (ص).
كمان لازم تقيم حجم الخسائر المحتملة من الغضب .. زي خسارة البيت والزوجة .. أو خسارة الوقت ... أو خسارة العمر كله أحياناً.
واعلم أن أول الغضب جنون وآخره ندم .. وأن الغضب لا يستمر إلا مع الجهلة .. ونحن في غنى عن الندم أو الاتصاف بالجهل.
