عرفنا الإشفعش وعرفنا أعراضه .. ومرة تانية بحذرك .. اياك من الكلمتين دول (إشمعنى .. ومينفعش).
ومعنى كلامي مش انك تتنازل عن حقك لو حسيت انك مهضوم حقك .. بس ماتقولش اشمعنى .. قول أنا ايه اللي ناقصني عشان آخد الحق ده .. دي طريقة أكثر ايجابية. طيب ده بياخدنا لطريقة العلاج .. ماتخافش مفيش حقن ولا لبوس وأدوية .. اديني ودنك واسمع كدة معايا:
- لازم نعترف ان العلاج (المؤثر) بيبقى من جوانا محدش حيعالجنا أحسن من نفسنا.
- عود نفسك بقى ماتقولش اشمعنى فلان .. لكن زي ما وضحنا قبل كدة .. اسأل أنا ايه اللي ناقصني عشان آخد المميزات دي .. ساعتها حتى لو مش ناقصك حاجة بتكون وضحت للي أدامك بطريقة ايجابية انك مش حتسيب حقك.
- كمان عود نفسك ماتقولش اشمعنى أنا اللي أعمل الشغل ده كله .. حتى لو كنت مظلوم ومحطوط عليك.. الافضل انك تقول أنا عارف اني باعمل الشغل ده كله عشان واثقين فيا وفي قدراتي .. ومتأكد ان ده حيكون له تأثير على خبراتي ومعارفي الوظيفية.
- كمان عود نفسك ماتقولش ماينفعش .. مهما كانت صعوبة المهمة .. استلم المهمة واجتمع مع زملائك واعملوا عصف ذهني عن ازاي نعمل المهمة دي بافضل طريقة .. وصدقني حتلاقوا طريقة بنسبة 90% أو اكتر .. طيب لو مالقيتش؟ .. والله عارف انك حتسأل السؤال ده .. لو مالقيتش هيبقى معاك نتائج التجارب والعصف الذهني اللي تثبت انك حاولت واجتهدت .. وده في حد ذاته له تقييم وتقدير خاص .. وممكن يكون هو ده اللي بيفرقك عن باقي الناس اللي بتقول اشمعنى هما.
- اشغل نفسك دايما ازاي أمنع وجود مشاكل أو معوقات في شغلي .. مش بس ازاي تحل المشاكل .. لا كمان تمنع حدوثها من أصله .. ده حينشط ذهنك ويخليك تفكر برة الصندوق.
- اشترك دايما في جلسات العصف الذهني بتاعة زملائك.
- ساعد زملائك في تأدية مهامهم وحل مشاكلهم .. لأن ده حيكسبك خبرات ومهارات زيادة تساعدك في حل مشاكلك.. صدقني الحلول عندك كتير .. وتقدر .. وبسهولة .. ماتبقاش إشفعشي.
