أيوووه .. حضرتك قريتها صح .. إِشْفَعْش .. ده مرض بيصيب الفاشلين أو اللي عايزين يفشلوا أي منظومة إدارية.

يعني ايه عايزين يفشلوا؟ .. هو في حد بيبقى عايز يفشل؟ الإجابة .. اه طبعا

بس خليني أقولك الأول يعني ايه إِشْفَعْش.

المصابين بالمرض ده دايما بيرددوا كلمتين هما (إشمعنى ... وماينفعش)

دايما تلاقيهم يقولوا .. إشمعنى أنا اللي أنفذ المهمة دي .. أو إشمعنى فلان يزيد مرتبه وأنا لأ .. أو إشمعنى فلان يروح المأمورية دي وأنا لاء .. دايما شاغل باله بغيره وحاطط نفسه في مقارنات مع اللي حواليه .. مش بيهتم بأداءه قدر ما بيهتم بأداء المحيطين ومقارنة نفسه بيهم .. وبينسى انه لما بيتطلب منه أداء مهمة معينة أو تنفيذ تعليمات معينة أول كلمة بيقولها هي ماينفعش .. بدون ما يحاول أو حتى يفكر المهمة دي ممكن تتأدى ازاي .. من غير مايكلف نفسه حتى انه يناقش الموضوع مع زملائه أو يعرض أفكار للتنفيذ .. دائما يفترض استحالة التنفيذ .. دائما رافض التغيير ومقاوم بشدة له.

بعد ما عرضنا معنى إِشْفَعْش .. افتكرت كام واحد معاك في الشغل عندهم إِشْفَعْش وبيفكر كدة .. ودايما ده سلوكه في الشغل؟

أكيد كتيييييييير .. بس اوعى تكون واحد منهم وأكيد اللي عندهم المرض ده هم ناس عايزة تفشل أو عايزة تتسبب في فشل المنظمة بتاعتها.

المقال اللي جاي حنتكلم عن كيفية علاج الإِشْفَعْش.